من الصميم وفي الصميم ((التحطيم))

هالموضوع كان حبيس الوورد لمدة أسبوعين ...

كل يوم اطل علية ... وأخفف حدة القصف مرة ... وأزيدها مرة

حسب الأحداث والمستجدات على صعيد المجتمع ...

وكالعادة ... الموضوع يحمل الكثير من النقد .. زي ماتعودتوا مني

:::::::::

مواقف كثير مرت علي وتمر علي من تصرفات شخصية

تحمل الكثير من السلبية وعدم المبالاة ...

خصوصاً من فئات الشباب والمراهقين ..لما أفكر وأسأل نفسي

ليش هم كذا ؟؟؟ وإيش سبب النظرة السلبية اللي نعاني

من تبعاتها ..لنا كشعب ..؟؟ ألقى كل طرق التفكير تقودني

لمؤسسي اللبنة الأساسية في شخصية أي طفل في مجتمعنا ..

طبعاً بغض النظر عن دور العائلة والمجتمع المعزز لهذا التأسيس

لكن لما تبنين بنيان .. وتتعبين فية ..وتسلمينة لشخص

يخربة ويدمرة ... راح يظل هالأثر باقي على طول الزمن ...

هذا للأسف الشديد الواقع المؤلم .. لبعض منسوبي التعليم لدينا ...

ودائماً ماأكرر أني ضد مبدأ التعميم ... فالبعض الآخر بذلو بإخلاص

ومازالو يحاربون عقد الروتين المتعشش في بعض العقول ...

فبينما يعتبر التعليم في البلدان المتقدمة ..هو صقل المدارك

ودعم المواهب .. وتطوير الشخصيه ..

يعتبر لدينا .. كبح للمدارك ...وردع للمواهب .. وترويض الشخصية ..

:::::::::::

من أهم أولويات التعليم لدينا .. هو كيف يطبق الطالب قوانينهم

بغض النظر عن مدى قناعتة بها ... لأن بعضها يتجاوز معظم القناعات

فمازالت القوانين الوضعية متجمدة من عام 200 قبل الميلاد

ولم يتم النظر في تطويرها لمسايرة ركب الحداثة والعولمة ...

ومازالت نظرية البكلة السوداء والبيضاء تتربع على عرش

الدستور القومي للوزارة .. ولا يهون الشراب الأبيض والجزمة السوداء

يعني اللي تلبس بكلة وردية تنتهك الدستور القومي ..هع

ويمكن بكل بساطة وهي تمشي بأمان اللة في الطابور الصباحي

تمتد عليها يد أحدى ديناصورات الحقبة الماضية ...

وتمتخ البكلة من راسها بكل شراسة ..(والله صارت ) وقدام كل البنات

صدقوني الوضع صار يعور القلب ... ومؤلم ...ومزري بصراحه ..

ونتيجة هالعنجهية الدستورية كثرت المخالفات السرية ... صارت البنت بدال

ماتفكر بدروسها ومستقبلها صارت تفكر كيف تخبي العطر ولا المشط عن

المعلمات لين سوو حمله تفتيش ..

صارو يدورون الممنوع ويتبعونة ..لأن محد أقنعهم ليش هو ممنوع .. الوضع الأخلاقي

صار متدهور في مدارس البنات .. بالذات المتوسطة منها ... لأنهم وفي هالسن

الحرجة مالقو إذن صاغية تتفهم إحتياجاتهم ..

ودور الإشراف الإجتماعي للاسف الشديد في مدارسنا صار تكملة عدد ...

وفي معظم المدارس تلقين أهم مهمة تسويها المشرفة لما ينزلون لها طالبة

تعبانة أنها تعطيها حبة بندول ...

شبابنا تفتحت مداركهم .. وأتسعت لإستيعاب عجلة الزمن اللي تسير بسرعه

جنونية ... لكن للأسف الشديد .. كل ماتسارعت العجلة كل ماأتسعت الفجوة

الفكرية والعاطفية بين المعلمين والطلبة ..

وماأستغرب كثير من هالفجوة لما أشوف المعلمة الخمسينية المتشبثة بكل قوة

بمنصبها وكل همها تفكر قبل تنام وش تاخذ معها حلى قهوة تزطة مع المعلمات

لأنها بكل بساطة تعجز عن إستيعاب طالبة مراهقة في زمن النت والإنفتاح ..

لذلك مايكون في يدها غير التعامل بطريقة الريس والمرؤوس ..

وآخر شي ممكن يفكرون فية هو الوصول لتفكير المراهقة أو حتى الطفلة وفهم

متطلباتها وفك شفرة مداركها ...ليش تتعب عمرها .. ؟!!!!!!!

:::::::::::

القصص اللي أسمعها من معلمات يعانون من قمع وتسلط

الإدارة .. ومن عنجهية بعض التعاميم

ومن بعض البنات اللي يعانون من رجعية وعقد بعض المعلمات

تدمي القلب ...

تحكي لي معلمة تأسيس ... (للصف الأول الإبتدائي ) في وحدة

من مدارس الرياض الحكومية ...

عن تعامل مديرة المدرسة وقوانينها الحازمة مع الطالبات ...

وتحلف وتقسم .. أنة في أيام الشتاء الماضي ...

كانت تشرح درسها في أمان الله .. وشوي إلا وتدخل المديرة

عليها وعيونها تتطاير من الشرر ...

وكانو الطالبات لابسين قبعات شتوية ..وتدور على البنات

وتمعط القبعات من روسهم ..!!!!!!!!!!!!!!

وهي تصارخ .. هاتوا ... يالله ... اللي بشوفها لابستها مرة

ثانية ياويلها مني ... تقعدون بس تممسسون بها وتتلهون عن الدرس

!!!!!!!!!!! تخيلوا ...

تقول هالمعلمة .. أنا وقفت طايرة عيوني ... وقلت وراك ياأبلا ......؟؟؟

قالت بس ... حومو كبدي مغير يلعبون بالقبعات ياما لبسوها

ويامافصخوها ... قالت المعلمة طيب الجو بارد عليهم ...

قالت ..أبد أبد .. مايحتاج ... وخذتهم كلهم وعطتهم المعلمة

قالت اللي تطلع في الطلعه عطيها إياها ولاعاد تجيبها معها

وبس طلعت وخبطت بالباب ...

تقول المعلمة .. أنا عيوني غرغرت من الدمعه .. ليش كذا ؟؟؟

ويوم سألت المعلمات برا ..قالت أنها شافت بنت في الساحه

تلعب بقبعتها وجن جنونها ...وأصدرت هالقرار الديكتاتوري

اللي يمكن ماأخذ حيز من تفكيرها بين صدورة وتنفيذة غير

دقيقتين ... لكن الأثر النفسي على الطالبات والبرد اللي بيحسون

فية مافكرت فية ....

وصدقوني .أمثال هالمديرة وااجد ...

تحكي لي بنت ..في الصف الرابع الإبتدائي ..في مدرسة حكومية

عن بعض تصرفات معلماتها ...

تقول هالبنت ...عندنا معلمة ...كل شوي تغيب ..

كل شوي ماخذة إجازة .. ولما تقرب الإمتحانات ..تمسكنا

حصتين ورا بعض ..وتدرسنا كل اللي فاتنا ... ومانقدر نفهم

عشانة كثير ....

ياسلام على الإخلاص والأمانة ... لو يتأخر راتبها يوم أنجنت

لكن الطالبات يتأخر منهجهم بالطقاق ... مايفهمون الدرس

مهوب لازم ..عنهم مافهموا ... أهم شي هي خلصت المنهج

المتراكم .

وتقول عندنا معلمة ... من تدخل الصبح وهي معصبة علينا ...

وكل شوي تقول (الله ياخذكم ويريحني منكم ) ولا ( جعلكم

تموتون ) .... ولما تشرح وبنت تتكلم ... تلتفت عليهم

وتقول ...(الحيـــــــــــ ..... انة ) اللي تكلمت ترفع يدها ...

عجبي يازمن على مربية الأجيال ...

يعني أنتي في البيت نايمة ..ومأمنة بنتك عند هالنوعية من

البشر عشان تهذبها وتعلمها .... ولما ترجع لك الظهر تكون

متشبعه بكل مفردات الغابة ... وتقعد عاد ترددها على أخوانها

أنعم وأكرم من معلمة وتعليم ....

كثير من المعلمات يعتقدون إن الطفل كائن بشري غبي . مايستوعب ومايفهم

وينسى الإساءة بسهولة ... وهنا للأسف بداية المشكلة ..

صدقوني ..فية أطفال كثير أذكى من معلميهم .. لأنهم أوسع إطلاع منهم

والطفل كلنا عارفين أنة يحفظ بسهولة أكبر من البالغ ..

انا شخصيا تعرضت لمواقف كثير في سنوات دراستي الأولية ..وللحين مانسيتها

لأنها سببت لي جرح كبير ...

منها أني مرة يوم كنت في الصف الثاني الإبتدائي ... يعني من شي 29 سنة هع

واقفة في الطابور مع أكثر من 400 بنت ..وسألوا سؤال في الإذاعه ..

وقمت من اللقافه رفعت يدي .. ونادوني اجاوب بالميكرفون ..(ياليتهم مانادوني )

وجاوبت وأنا متشققة من الوناسة ... وتشققت أكثر يوم طلع صح ...

ومن زود الشقشقة نسيت أن في فمي علك ... عاد ساحت خشتي من

الفرحة وبين العلك فيها ... قامت الديناصورة اللي ماسكة المكرفون توها

ماأمداها تقول صح عليك الإجابة صحيحة عطوها الجائزة (الله يالجائزة عاد قلم أبو نص)

إلا وتصرخ علي ... (ذبي العلك من فمك )

لاتنسون ال400 بنت اللي مركزين علي .. (نجمة الحفل )

قمت من الروعه نقزت الكم متر اللي بيني وبين الزبالة بخطوتين ..وبغيت

أطيح بكبري فيها من الروعه ...

ورجعت لطابوري وقفاي ... إلا كلي ...أقمر عيش ... ومانسيت هاللحظة كل

هالسنوات ال 10 هع ( هونت عن ال29 )...

ومازالت السيمفونيات مستمرة ... ومازالت طرق التعليم والتهذيب متوارثة ..

من جيل لجيل ...

مرة معلمة من نوعية الديناصورات (بس في أيامنا ذي ..)

قاعدة تدور على البنات في الصف تطالع

الواجب حالينة ولا لا .. ولما لقت وحدة من البنات ماحلت واجبها ضربتها على

ظهرها .. وكملت دورانها ...

ووصلت لبنت قاعدة تكلم اللي جنبها قامت صرخت فيها ...

ماتدرين إن الكلام في الصف ممنوع ؟؟؟

قامت ردت عليها البنت ...حتى الضرب في الصف ممنوع !!!!!!!!!!!!!!!!!!

هنا طلع لها بركان على راسها وقامت تصارخ بكل قوتها على البنت

ياقليلة الأدب ياللي ماتربيتي وياللي ... وياللي ....

مع العلم ان البنت صادقة ... وردها منطقي ... وتستاهل المعلمة الحرج

اللي حطت نفسها فية ... بس طبعا .. شالت البنت ونزلتها الإدارة وكتبوها تعهد

!!!!!!!!!!!!!!!!!!!!!!!!!!!!!!!!!!!!! ... ( التصرف المعتاد لكل من ناقش الأسياد )

للأسف .. الحوار لغة لانتقنها كشعب .. لأننا تعلمنا من يومنا صغار إن الحوار عيب

والرد علية وقاحه ... وتعودنا من يومنا صغار على إن اللي يحاول يرد

لازم يسمع (شب .. وأووص ولا كلمة ) ..لذلك مااستغرب من اللي أشوفة ..

شباب مايقدر يتكلم جملة مفيدة في أي لقاء تلفزيوني ..

صرنا نوصم بالهمجية والغباء بالردود بدون ذنب ...

حريم وشابات كثير أشوفهم .. مايقدرون حتى يحاورون أزواجهم أو يردون على

كلامهم المسئ ... غير بالدموع .. لأنهم يمكن لو قالو شي خربوها ..

ولاتقولون فية طلاب وطالبات ماعندهم أدنى إحترام للمعلمين ... بقولكم صح ...

الوضع في المدارس صار خطير ويحتاج وقفة ودراسة ( هيهات ) ...

لكن موضوعي هذا يتكلم بس عن جزئية تعامل بعض المعلمين والمعلمات مع طلبتهم ..

لأن المعلم رسول والتعليم رساله ... لكن كثير منهم ضيعوا الرساله للأسف ...

بسبب عقدة الرئيس والمروؤس ...

أكاد أجزم لكم بدون حتى ماأسوي إحصائية ... إن 95% من طلابنا يكرهون التعليم والدراسة ...

لأنة ماشافو أي وسيلة من وسائل الترغيب ...

حتى المدارس الخاصة ... قلبت المعادلة ... وتحولت لمرتع للدلال والترفية ...بسبب أن الطالب

عندها مجرد بقرة حلوب ... ومايقدرون يضيقون صدرة ... فهم كان بها ... مافهم عنة مافهم

نجح ..خير وبركة ... مانجح الله يسلم الدف والزحلطن ...

لأننا وبكل جدارة نحتل الصدارة ( الصدارة الوحيدة اللي نحتلها )في الواسطة والمحسوبية ...

واللي عندة فيتامين واو ..ماشي حالة ..واللي ماعندة يطيح حظة ...

فصارو الطلاب بين حيص بيص .... يايروح الخاصة ويحصل الدلال والزحلطن ويتخرج بدرجة يااي مع مرتبة

الشرف ....يايروح المعتقل ويتخرج بدرجة عقدة مالها حل مع مرتبة الشرف ....

$$ ولنا لقاء قريب ... مع هم من هموم المجتمع الغريب ... $$

:::::::::::::::

ملاحظة ... إطلاق كلمة ديناصور ليست من باب السب والتحقير .. إنما هي للتشبية

على شي مبطي وقليل الوجود ويخوف ومتحجر ...

وأرجع أكرر .. نص صديقاتي معلمات ...وبعض مشرفاتنا معلمات ..وأكيد كثير من عضواتنا ..

وفية نماذج مشرفة جدا جدا .. لامن معلمات ولا من معلمين ... لكن مانقدر

نغطي الشمس بمنخل ... هالشي موجود ..وهالنماذج موجودة ...

وكوننا نتغاضى عنة هذا مهوب حل ...

demo

صراحة الموضوع عرفتي تحطين له عنوان جد يعبر عنه